طبتم أحبتي… وطابت أوقاتكم بكل خير، وجعل الله أيامكم كلها رضا وسكينة…
ها أنا أعود إليكم سريعًا، وكأن القلب لا يعرف الغياب، أعود بثلاث زهرات غاليات… بل ثلاث بساتين كاملة… من زمن النقاء… من زمن كانت فيه القلوب صافية والضحكة طالعة من القلب من غير حسابات…
اليوم مفيش ترتيب… لأن الحب ميتقسّمش…
ومفيش ألقاب… لأنهم في القلب إخوة أعزاء… كلهم سواء…
🌸 ناصر عفاص
حبيبنا… وحبيب الكل…
إنسان من أنقى ما يكون… ضحكته كانت لوحدها كفيلة تعدّل ميزان يومك…
تشوفه تحس إن الطيبة لسه بخير…
ابتُلي بالمرض… وصبر… وما سمعناش منه شكوى… وكأن الصبر كان طبعه مش اختبار عليه…
رحمه الله رحمة واسعة بقدر صفاء قلبه…
🤲 اللهم اجعل ابتسامته نورًا يضيء قبره، واجعل صبره على المرض رفعة له في أعلى الدرجات، واجعل الجنة داره ومستقره يا رب…
🌸 أحمد البريدي
صانع البهجة…
اللي كان يفرح لفرح غيره كأنه فرحه هو…
دايمًا موجود بالكلمة الحلوة… بالمجاملة الصادقة… بالموقف اللي يثبت إن الدنيا لسه فيها خير…
خفيف على القلب… تقيل في الجد…
والنوع ده لما يمشي… بيسيب أثر مش بيروح…
رحمه الله رحمة واسعة وجعل طيبته في ميزان حسناته…
🤲 اللهم اجعل كل فرحة زرعها في قلوب الناس نورًا له في قبره، وسعادة لا تنقطع عنه في جنته، واجعل عمله الصالح شفيعًا له يا كريم…
🌸 أحمد ربيع
وهنا… الكلام بيقف احترامًا…
رجل رزقه الله بحسن خاتمة يتمناها أي إنسان…
توفي في رمضان… في العشر الأوائل… وهو صائم…
بل وكان يحتضن كتاب الله… يقرأ القرآن… وكأنها لحظة كان قلبه مستنيها طول عمره…
أي كرامة بعد ذلك؟!
وأي علامة أجمل من كده؟!
كان جارًا وأخًا خلوقًا لا يُذكر إلا بالخير…
رحمه الله رحمة واسعة…
🤲 اللهم كما أكرمته بحسن الخاتمة، فأكرمه بجناتك، واجعل القرآن أنيسه في قبره، ونورًا له، وارزقه لذة النظر إلى وجهك الكريم يا رب…
هولاء هم زهراتي اليوم
فاللهم اغفر لهم وارحمهم، واعفُ عنهم، وأكرم نُزلهم، ووسّع مدخلهم، واغسلهم بالماء والثلج والبرد، ونقّهم من الذنوب كما يُنقّى الثوب الأبيض من الدنس…
اللهم اجعل قبورهم روضة من رياض الجنة، ولا تجعلها حفرة من حفر النار…
اللهم آنس وحشتهم، وارحم غربتهم، واجعل الجنة دارهم وقرارهم يا رب العالمين…
احبتي اعزائي
دول مش مجرد أسماء عدّت علينا…
دول حكايات عاشت جوانا… وضحكات لسه صداها في وداننا…
رحلوا… لكن سابوا أثر يخلي الدعاء ليهم يطلع من القلب من غير تفكير…
رحلوا… لكن فضلوا جوانا بكل حاجة حلوة عملوها…
"البستان لسه بيطرح… والطيبين عمرهم ما بيغيبوا… هما بس بيسبقونا على الجنة." احبتي اترككم في رعاية الله وأمنه مع وعد بلقاء قادم أن كان في العمر بقية
حسين عارف المحفوظي
كاتب محتوى
لا توجد تعليقات بعد. سجّل الدخول لبدء نقاش ابدأ نقاشًا جديدًا